“Ağ şəhər” layihəsi çərçivəsində “Yaşıl Ada və Babək” adlanan ərazinin bir hissəsini əhatə edən 2-ci mərhələ çərçivəsində “Azəravtoyol” ASC tərəfindən ümumi uzunluğu 3.5 km olan 4 əsas və 7 kəsişən küçədə, həmçinin 1 yeraltı piyada keçidində yüksək keyfiyyətlə və texnoloji ardıcıllığa riayət edilməklə aparılan tikinti işləri artıq yekunlaşmaq üzrədir.
Sözügedən küçələr bunlardır:
- Xəqani Rüstəmov küçəsinin 530 m-lik hissəsi;
- Süleyman Vəzirov küçəsinin 620 m-lik hissəsi;
- Mərkəzi bulvar küçəsinin 580 m-lik hissəsi;
- 1-ci Fəvvarələr küçəsinin 570 m-lik hissəsi;
- Bu küçələrlə kəsişən və ümumi uzunluqları 1260 m olan 7 kiçik küçə.
Sözügedən küçələrin ümumi uzunluqları 3560 m təşkil edir. Küçələrin eninə gəldikdə isə Xəqani Rüstəmov küçəsi 45 m, Mərkəzi bulvar küçəsi 37 m, Süleyman Vəzirov və 1-ci Fəvvarələr küçələri 32 m, kəsişən digər 7 kiçik küçələr isə 20-32 m enində layihələndiriliblər.
Adı çəkilən küçələrdə köhnə yararsız qrunt 2 m-ə yaxın dərinlikdə qazılaraq çıxarılıb, əvəzində xüsusi material tökülərək, kipləşdirilib və yeni yol yatağı inşa olunub, həmçinin zəruri olan bütün yeraltı kommunikasiya xətləri çəkilib. Daha sonra qum-çınqıl və optimal qırmadaş qarışığından ibarət yol əsasının inşası işləri aparılıb. Hazırda isə küçələr boyu asfalt-beton örtüyünün döşənməsi işləri aparılır.
İki böyük prospekti, Nobel və Babək prospektlərini birləşdirmək baxımından xüsusi əhəmiyyətə malik Xəqani Rüstəmov küçəsinin ümumi uzunluğu 1050 m təşkil edir. Küçədə yenidənqurma işləri qalan 530 m-lik hissədə tam şəkildə yekunlaşmaq üzrədir. Burda layihə çərçivəsində 25 ədəd işıqlandırma dirəyi quraşdırılıb, 9.5 min m2 səkilərin üzərinə tamet daşları döşənib, 2.5 min p/m mərmər-qranit səki daşı quraşdırılıb. Hal-hazırda 15 ədəd yol nişanı və 50 ədəd yağış suyu axıdıcı barmaqlıqlar quraşdırılır və işlərin davamı olaraq xətlənmə işləri aparılır.
Layihəyə uyğun olaraq Xəqani Rüstəmov küçəsi ilə Süleyman Vəzirov küçəsinin ksişməsində 66 metr diametrində yeni dairə inşa olunur. Dairə tam fərqli bir dizaynda tikilir və xüsusi yaşıllıq, həmçinin bəzək daşları ilə bəzədilır.
Bundan başqa sözügedən ərazidə 1 yeraltı piyada keçidinin tikintisi də yekunlaşmaq üzrədir. Keçidin 220 m uzunluğunda olan qalereyasının tikintisi tam yekunlaşdırılıb və hazırda keçidin qranit-mərmərlə üzlənməsi işləri davam etdirilir. 8 ədəd çöl şəraiti üçün nəzərdə tutulan eskalatorlar quraşdırılmış keçid, işiqlandırma sitemi və nəzarət kameraları, həmçinin 3 sanitar və mühafizə otaqları ilə də təmin olunub.
Tikinti və yenidənqurma işləri çərçivəsində Süleyman Vəzirov və Mərkəzi bulvar küçələrində, 1-ci Fəvvarələr küçəsində, həmçinin 7 kəsişən kiçik küçələrdə də son tamamlanma işləri aparılır, yollar asfaltlanır. Asfaltlanan ərazinin ümumi sahəsi 41 min m2 təşkil edir.
Layihə çərçivəsində küçələrdə 28 min m2 piyada səkisi və yol ayrıcı inşa olunub, hazırda üzərlərinə tamet daşları döşənir. Səki və yol ayrıcının kənarlarına ümumilikdə 7.5 min p/m qranit-mərmər səki daşı düzülüb. Bundan başqa yolların kənarlarında (səkilərdə) 350-dən çox çinar və zeytun ağacı əkilib. Küçələrdə müasir işıqlandırma sisteminin qurulması üçün müasir üslublu 150 ədəd yol işıqlandırma dirəkləri quraşdırılıb.
Bundan başqa şəhər salma prinsiplərinə uyğun olaraq yolların kənarlarında (səkilərdə) fiziki qüsurlu vətəndaşların rahat hərəkəti üçün səsli svetaforlar, səkiyə qalxıb-enmək üçün enişli-yoxuşlu ramplar qoyulur, həmçinin avtomaşınlar rahat parklaması üçün xüsusi parking yerləri də nəzərdə tutulub. Layihə çərçivəsində Mərkəzi bulvar küçəsi ilə Süleyman Vəzirov küçəsi arasında xüsusi yaşıllıq zonası “Skver Park” sahəsi salınır.
Qeyd edək ki, 1-ci mərhələ çərçivəsində “Yaşıl Ada və Villa Zonası” adlanan ərazidə ümumi uzunluğu 2 km-ə yaxın əsas və kəsişən bir-neçə küçə, həmçinin 1 yeraltı piyada keçidi tikilərək istifadəyə verilmişdi. Bu:
- Xəqani Rüstəmov küçəsinin 520 m-lik hissəsi;
- 1-ci Yaşıl ada küçəsinin 420 m-lik hissəsi;
- 2-ci Yaşıl ada küçəsinin 450 m-lik hissəsi;
- Bu küçələrlə kəsişən və hər birinin uzunluğu 113 m olan 4 kiçik küçələrdi.
Sözügedən küçələrdə 20 min m2 piyada səkisi və yol ayrıcı inşa olunub və tamet daşları döşənib. Səki və yol ayrıcının kənarlarına ümumilikdə 15 min p/m qranit-mərmər səki daşı düzülüb. Bundan başqa yolların kənarlarında (səkilərdə) 300-ə yaxın çinar və zeytun ağacı əkilib, 500 ədəd işıq dirəkləri quraşdırılıb.
Həmçinin Xəqani Rüstəmov Küçəsi İlə Nobel Prospekti kəsişməsində 4 giriş-çıxışı və 220 m uzunluğunda qalereyası olan yeni yeraltı piyada keçidi də inşa olunaraq vətəndaşların istifadəsinə verilib.
Xatırladaq ki, “Xəqani Rüstəmov küçəsi və "Ağ şəhər" avtomobil yollarının infrastruktur layihəsi” çərçivəsində Xəqani Rüstəmov və Süleyman Vəzirov küçələri də daxil olmaqla ümumi uzunluğu 22.3 km, eni isə 16 m-dən 47 m-ə kimi dəyişən 63 çoxsaylı kəsişən yollar yerləşir. Yollar hər birinin eni 3.5 m olmaqla 2,4 və 6 hərəkət zolağından ibarətdir, piyada səkilərinin eni isə 3, 6, 10 m olmaqla müxtəlif ölçüdədir.
