Qaradağ rayonunda 22.9 km uzunluğa malik 2 mühüm layihənin icrası işləri artıq yekunlaşır - VIDEO / FOTO

Prezident İlham Əliyevin tapşırıq və sərəncamlarına əsasən, Azərbaycan Avtomobil Yolları Dövlət Agentliyi tərəfindən Bakı şəhərinin qəsəbələrini birləşdirən avtomoil yollarının yenidən qurulması işləri 2019-cu ildə də yüksək keyfiyyətlə və sürətlə davam etdirilir. Vətəndaşların rahatlığı üçün hesablanmış layihələrin icrası çərçivəsində Qaradağ rayonunda 22.9 km uzunluğa malik 2 mühüm layihənin icrası işləri artıq yekunlaşır.

Bu  uzunluğu 13.8 km olan Lökbatan-Qızıldaş və 9.1 km-lik uzunluğunda olan Lökbatan-Güzdək qəsəbələrarası avtomobil yollarıdır.

Lökbatan-Qızıldaş və Lökbatan-Güzdək avtomobil yollarının əsaslı şəkildə təmir olunmadan uzun illər istismar olunması, əsasən ağır tonnajlı yük maşınlarının hərəkəti nəticəsində yol geyimi və yol əsası deformasiyaya uğramış, qabarma və çalalar əmələ gəlmişdi. Bu isə vətəndaşların gediş-gəlişində çətinliklərə səbəb olurdu. Bu üzdən Dövlət Agentliyi tərəfindən sözügedən yolların ötən il əsaslı şəkildə təmirinə start verilmişdir.

Hər iki avtomobil yolu 2 hərəkət zolaqlı olmaqla 3-cü texniki dərəcəyə uyğun olaraq yenidən qurulub. Layihəyə uyğun yolun hərəkət hissəsi 7 metr olmaqla, yol yatağının eni 12-13 metr təşkil edir.

Yollar boyu yeni yol yatağı inşa olunub. Bu çərçivədə yağıntılar zamanı yolların hərəkət hissəsinə suların dolmasının qarşısını almaq məqsədi ilə kənardan xüsusi material gətirilərək yol yatağı 1-1.4 metr hündürlüyə qaldırılıb. Daha sonra lazımi qalınqlarda optimal-qırmadaş və qum-çınqıl qarışığından ibarət yol əsasının inşası işləri aparılıb.

Torpaq işləri bitəndən sonra hər iki yola 2 qat olmaqla 12 sm qalınlığında yeni asfalt-beton örtüyünün döşənməsi işləri aparılır ki, bu işlər də yaxın günlərdə tam olaraq bitəcək. Yollar boyu asfaltlanan ərazinin sahəsi 160 min kv.m-dən çoxdur.

Bundan başqa layihəyə uyğun olaraq Lökbatan-Qızıldaş və Lökbatan-Güzdək avtomobil yollarında ümumilikdə 5 nöqtədə yolun altından suların ötürülməsi üçün suötürücü dəmir-beton boru quraşdırılıb, mövcud 5 metr uzunluğunda dörbucaqlı su keçidi əsaslı şəkildə bərpa olunub.

Layihənin zəruri ərazilərində yeni piyda səkiləri və yol ayrıcı inşa edilib, kənarlarına yeni səki daşları düzülüb.

Anar Nəcəfli – AAYDA-nin İctimaiyyətlə əlaqələr şöbəsinin rəisi:

"Lökbatan-Qızıldaş avtomobil yolu 46 min əhalinin yaşadığı 4 yaşayış məntəqəsi, Lökbatan-Güzdək avtomobil yolu isə 43 minə yaxın əhalinin yaşadığı 3 yaşayış məntəqəsi arasında nəqliyyat əlaqəsini xeyli rahatlaşdıracaq, yolun birləşdirdiyi qəsəbələr arasında yük və sərnişin daşıması asanlaşacaq. Ən əsası respublika əhəmiyyətli  H.Z.Tağıyev-Sahil avtomobil yoluna çıxmaqla rahat şəkildə istər Şamaxı və Quba istiqamətlərində, istərsə də Ələt-Astara və Qazax istiqamətlərinə hərəkət etmək mümkün olacaq. "

Azərbaycan Avtomobil Yolları Dövlət Agentliyinin rəhbərliyinin birbaşa nəzarəti altında, texnoloji ardıcıllığa uyğun və yüksək keyfiyyətlə aparılan yenidənqurma və bərpa işlərindən sonra yol boyu hərəkətin normal təşkili üçün yol nişanlarının quraşdırılması və yolun xətlənməsi kimi zəruri tədbirlərin həyata keçirilməsi planlaşdırılır.