Azərbaycan prezidenrti İlham Əliyevin vətəndaşların gediş-gəlişini və kənd təsərrüfatı məhsullarını birbaşa olaraq əkin sahələrindən bazarlara rahat çatdırılmasını təmin etmək, o cümlədən bölgələrin turizm potensialını artırmaq istiqamətində verdiyi tövsiyyə və tapşırıqlarına əsasən “Azəravtoyol” Açıq Səhmdar Cəmiyyəti tərəfindən komplekls tədbirlər davam etdirilir.
Bu dəfə Tovuz rayonunun Qovlar-Alakol-Ağacqala-Sarıtala avtomobil yolunun tikintisinə start verilib.
Qovlar-Alakol-Ağacqala-Sarıtala avtomobil yolunun tikintisi işlərinə prezident İlham Əliyevin 19 fevral 2016-cı il tarixli imzaladığı sərəncamla “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı” çərçivəsində başlanılıb.
50 kilometr uzunluğunda mövcud avtomobil yolu 4-cü texniki dərəcəlidir, çınqıl və torpaq örtüklüdür. Layihə çərçivəsində ilkin mərhələdə yolun Əyyublu-Alakol kəndləri arasında olan 17 kilometrlik hissəsinin 3-cü texniki dərəcəyə uyğun salınması nəzərdə tutulub. Digər mərhələlərdə yolun qalan hissələrinin tikintisi aparılacaq.
Layihə çərçivəsində tikintisi aparılan 2 hərəkət zolaqlı yolun torpaq yatağının eni 12 metr, bərkidici zolaq da daxil hərəkət hissəsinin eni 8 metr, hər iki istiqamət üzrə çiyinlərin eni 2 metr olacaq. 17 km-lik hissəyə 2 qat olmaqla 135 min m2 yüksək keyfiyyətli asfalt-beton örtüyünün döşənməsi planlaşdırılır.
Aparılan tikinti işləri zamanı Zəyəmçay üzərində yerləşən körpü də əsaslı təmir olunacaq. Sözegedən körpünün uzunluğu 74 paqon-metr, eni 11 metrdir. Əsaslı təmir zamanı körpüdə hər iki istiqamət üzrə 1 metr enində piyada səkiləri yaradılacaq, körpünün kənarlarına 148 paqon-metr mühəccərlər və vətəndaşların təhlükəsizliyini təmin etmək məqsədi ilə səki ilə yolun hərəkət hissəsi arasında 148 paqon-metr təkərqaytaranlar quraşdırılacaq.
Bundan başqa tikinti işlərinin aparıldığı 17 kilometrlik hissədə 16 yeni suötürücü boru tikiləcək, əkin sahələrinə suların ötürülməsi üçün avtomobil yolunun altından 46 yerdə borular qoyulacaq.
Hazırda layihəyə uyğun olaraq torpaq işləri görülür, yol 1 metr dərinlikdə qazılır və yol yatağı ilə yol əsasının tikintisi işləri aparılır.
Tikinti işləri “Azəravtoyol” ASC-nin rəhbərliyinin nəzarəti altında texnoloji ardıcıllığa riayət olunmaqla aparılır. Bunun üçün əraziyə lazımi sayda canlı qüvvə və yol texnikası cəlb olunub.
Sözügedən avtomobil yolunun tikintisi ilə 16 yaşayış məntəqəsinin 50 min nəfərə yaxın əhalisinin gediş-gəlişi xeyli asanlaşacaq, bölgənin turizm potensialı artacaq və yeni yol kənd təsərrüfatının inkişafına gətirib çıxaracaq.
